السيد الاستاذ محمود سعد :

 تحيه طيبة و شكرا على برنامجك القدير اعرض على سيادتك مشكلتى الغريبه اللى انا مش فاهم لها اى حل ؟؟ ليه و ازاى اللى حصل ...

 احنا مجموعه من الشباب عددنا 3 اشتركنا سوا فى فتح مشروع" لعدم توفر الفرص فى الشركات والاماكن الحكوميه " سايبر انترنت و صيانه كمبيوتر كل اللى حيليتنا 5 كمبيوترات فوجئت و انا قاعد فى المحل لاقيت ميكروباص 14 راكب انتشر منه 5 افراد و جريوا على المحل عندنا سالناهم انتوا مين ردوا علينا احنا مصنفات فنيه ياروح امك شكرا ياباشا متكلمناش معاهم اخدوا كمبيوتر من عندنا و اخدو شريك مننا و فضلوا يلفوا بيه وصلوا القسم و احنا مش عارفين ايه التهمة اصلا و ايه الموضوع وفيه ايه بالظبط دخلت المباحث اسأل مين البهوات اللى جم عندنا المحل قالولى دول الاموال العامه " سؤال : ماهى علاقه الاموال العامه بينا ؟؟

و سؤال اخر مش المفروض يكون فى تنبيه او حاجه زى كدة لاننا بدون خبرة و معندناش توعييه بالمواضيع دى او منعرفش الكلام دة او اى حاجه فيه ومش المفروض ان كلهم ظباط محترمين يعنى بدون التهم و الرشاوى اللى حصلت فى القسم " سألنا الظباط المحترمين ياجماعه الكمبيوترات دى غالبة طب نعمل ايه علشان نخرج زميلنا دة قالولنا هاتولينا اكل علشان جاعنين جبنالهم فراخ و كفته و كباب بعد ما اكلوا قالوا عايزين بيبسى جبنا 24 كنر بيبسى علشان الظباط و امناء الشرطه المحترمين كانوا عايزين ياكلوا و يشربوا بعد ما اكلوا و شربوا قالوا بقاا يهضموا الاكل تعدوا على زميلنا بالضرب و الاهانه و السب و كانت اخر بهدله و كان يوم صعب جدااا تم تحويل زميلنا الى النيابه و تفضل و كيل نيابه اكتوبر مشكوراا و تفهم الموقف اللى فيه زميلنا و عرف ان التهم المقدمه عليه كلها مزورة ليه لان زميلنا طالب فى كليه الحقوق و كان بيتكلم معاهم بالقانون فعلشان كدة اضطهدوة علشان كان بيكلمهم بالقانون و تم تحويله الى القسم لاتخاذ باقى الاجراءت معاه " المشكله ان مفيش اصلا اى جريمه لكل الموضوع دة " طيب انا عايظ افهم حاجه ليه الحكومه بتشل حركتنا كشباب ؟؟ هما عاجبهم نبقى قاعدين فى البيوت مستنيين نصيبنا ؟.؟ ولا ايه طب احنا ازااى هنعمل المستقبل ؟؟ ازاااى نتصرف ؟؟ نعمل ايه نشتغل حراميه ؟ طب نتصرف ازاى ؟؟ طيب طالما احنا عملنا حاجه غلط و دى كانت حمله على مستوى المدينه مع اننا احنا و اللى ملهمش وسايط بس اللى اتظلموا فى المواضيع دى كلها طيب مش يقولولنا اننا كدة غلط ولازم نروح فى مكان و نعمل ورقنا و يتابعونا كل لما ينزلوا وصلنا لحد فين ولا من الدار الى النار على طول ؟..

على فكرة يافندم نسيت اقول لحضرتك احنا بقالنا شهر فاتحين 30 يوم بس دة كل اللى احنا عملناة و ناس بقالها سنين فاتحه و محدش قرب عندهم و المحلات جنب بعضيها ولا علشان احنا معندناش وسطه بس لينا رب و شكرا لسيادتك يااستاذنا الكريم