مهزلة القومسيون الطبى

مهزلة القومسيون الطبى

الإسم :
الدولة : مصر
الإيميل : [email protected]
التليفون : 0124041783
تاريخ إرسال الشكوي :
Saturday 31st of January 2009 06:52:19 AM
هل ترغب في زكر معلوماتك الشخصية : نعم
طبيعة الموضوع : شكوي

الموضوع :
طبعا انا عارف ان شكوتى دى حيكون مصيرها اقرب صندوق زبالة بما انى بشكى جهة حكومية زى ما اتعودنا دايما فى بلدنا الديمقراطى(جدا) مصر واللى المسئولين فيه بيحافظوا على ادمية المواطنين وحقوق الانسان(!!!!) بس انا قلت اكتب وخلاص من باب الدردشة والفراغ..نيجى بقى لموضوع الشكوى..من حوالى 13 سنة رحت المرور اطلع رخصة خاصة وهناك لاحظ الضابط ان رجلى الشمال فيها عرج خفيف فحولنى للقومسيون الطبى للكشف على وهناك بعد ما كشفوا على قالولى ان رجلى الشمال بها تيبس بالركبة وما بتتنيش لدرجة 90 درجة وبالتالى مش هينفع اسوق وادوس على الدبرياج ومحتاج سيارة مجهزة طبيا يكون دبرياجها فى اليد وطبعا انا ساعتها مكنش معايا فلوس اشترى سيارة عشان كنت لسه طالب فطنشت بس اعتبرتها ميزة وفضلت احلم باليوم ده ..ولما كبرت وربنا كرمنى بقرشين قلت احقق حلمى فتوجهت الى المجالس الطبية ودفعت 500 جنيه عشان يحددولى ميعاد للكشف - مع ان قرار الوزير رقم 450 لسنة 1994 بيحدد 50 جنيه بس يدفعها طالب السيارة مقابل الكشف عليه مين بقى خلاهم 500 وامتى؟؟الله اعلم- المهم دفعت ال500 وبعد كده طلبت موظفة الشباك هناك -اللى المفروض بتتعامل مع معوقين ويكون عندها رحمة الا انها كانت بتتعامل مع الناس بمنتهى الغلظة والجليطة والتكبر وكأنها وزير الصحةالمهم الهانم اعطتنى نموذج الكشف وطلبت منى اصوره 5 نسخ مع انى مش هحتاج الا واحد بس وعرفت السبب بعد كده انها بتوزع الاربعة التانين على بقية الناس اللى بتخليهم برضه يصوروه خمس نسخ..المهم رحت بعد كده للقومسيون الطبى اللى فى مستشفى المنيرة العام فى السيدة زينب وهناك لقيت اسوأ معاملة ممكن تتعامل لبنى ادمين وحسيت اد ايه المواطن المصرى مقهور ومش طايل حتى معاملة الحيوانات اللى بيعاملوها فى الدول المتحضرة لحيوانتهم .. فى المستشفى دى حسيت انى متهم ورايح انفذ حكم مش اجيب سيارة كله بيشخط فيك ويتاّلط عليك من تمرجية وممرضين وموظفين كل همهم ازاى يستغلوك ويطلعوا منك فلوس وخلاص حتى الكراسى هناك ممنوع المعوقين يقعدوا عليها الا لما يطلبوا مشروب من البوفيه واللى مش عاجبه يفضل واقف -لاحظ انا بتكلم عن معوقين-المهم واحنا فى صالة الانتظار مستني دورى نده موظف علينا وقال بصوت عالى :كل واحد يقلع جزمته ويشمر بنطلونه ويبين مكان اعاقته قبل الدخول لحجرة الكشف وحسسنى ان احنا داخلين نمسح مش نكشف وكان المفروض ده يحصل داخل حجرة الكشف مراعاة لمشاعر المعاقين المهم نفذنا الاوامر ولما جه دورى ودخلت لقيت دكتورة كبيرة فى السن وطبعا كالعادة عليها غضب الله ومعاها دكتور شاب بصتلى الدكتورة بقرف وقالتلى حرك مشط رجلك ..ارفع ايدك فوق .. خلاص كفاية ..اللى بعده..من غير حتى ماتكشف على او تعرف اعاقتى ايه قلتلها يا دكتورة انا اعاقتى فى ركبتى وعندى تيبس فى العضلات ورجلى ما بتتنيش .. شخطت فى وقالتلى قلت خلاص اللى بعده وطردتنى بره وطبعا مشيت وانا عارف النتيجة ان طلبى هيترفض وهتروح على ال500 جنيه وطبعا بما اننا فى مصر لو معايا واسطة كان زمانهم عاملونى احسن معاملة ووافقوا على طلبى وعليه بوسه حتى لو كنت سليم بس هى دى مصر ام الدنيا وام الشفافية وحقوق الانسان والعدالة الاجتماعية والكلام الكبير اللى بنضحك بيه على الناس الغلابة ........الواقعة مهداة الى وزير الصحة

هل لديك اقتراح بخصوص هذه الشكوى ؟
أرسل لنا وساهم في إنصاف صاحبها .

عدد زوار هذه الشكوي 5334