السلام عليكم ورحمة الله وبركاتة اول مرة فى حياتى ابعت شكوى بعد سؤال الله عز وجل . لكن المرة دى فاقت اى احتمال . انا طبيبة وجوزى طبيب فى مقتبل عمرنا اخدنا شقة فى برج فى دار السلام حى المعادى وفرحت من كل قلبى اننا بقى عندنا شقة ومش هانقعد عند الناس او نشيل هم ايجار كل شهر بعد مااستلفنا واخدنا قرض على مرتباتنا من البنك وبعت دهبى واذا بسيادة المحافظ يبلغ قرار ازالة للبرج مع ابراج اخرى . طيب الابراج دى بقالها اكتر من سنة مبنية والناس كلها اشترت فيها وناس سكنت , ماتت فرحتى وفرحة ابنى الذى لم يبلغ عامة الاولى يا استاذ محمود انا بكتبلك ودموعى على خدى الفلوس دى نجيبها منين تانى انا وجوزى وصاحب البرج اللى اتحطت علية النصيبة يعمل اية كمان . مرتبى كام يعنى جوزى قطع دراستة وسافر للخارج عشان يكمل اقساط شقتة , لا نملك الملايين لكدة , بنادى وبترجى سيادة الرئيس وقف الهدم وقف المهزلة دى لاننا كلنا هانكون فى الشارع , ياسيادة الرئيس احنا ولادك , كتير من الابراج على الكورنيش وغير الكورنيش لم ترخص المساواة فى الظلم عدل . ارحموا من فى الارض . وياريت المحافظ يوقف المهزلة دى لانة خراب بيوت حقيقى . اشتغل ازاى واكشف على العيانين ازاى وانا كلى حسرة وهم ياريت تردوا علية وماتهملوش رسالتى دى