انا واحد من الشباب الي اتخرج و الحمدالله ربنا وفقني و لفيت شغل في شركه محترمه مليش في الدنيا غير والدي البالغ من العمر 66 سنة و اخ متزوج لا يعمل و يسكن شقه ايجارها 550 جنيه و يعول طفله بنت 7 شهور مشاكلي كثرت و تساؤلاتي اكثر ياترى هييجي اليوم و الاقي حل مش عارف .. فكرت ابعتلكو لأني بحتلرمكو كلكوا و اتمنى اني الاقي حل عندكو / انا موظف في شركه بمرتب يادووب بيكفيني مع اني بساعد اخويا و والدي بالي بقدر عليه .. مرتبط ببنت بحترمها و بحبها و بتمنى انها تكون زوجتي و الأمنيه دي من زمان بس لسه بحاول احققها . فكرت احوش مش عارف و اهلها رفضين الشقق الأيجار لازم يكون عندي شقه تمليك و طبعا لازم اصرف توضيب الاف الجنيهات ده غير اني اصلا مش لاقي شقه مقدمها معقول اقدر عليه ولا قسطها يكون كويس لكن لحد النهارده اقل قسط كان بمرتبي كله و اقل مقدم عشان اقدر عليه قدامي 10 سنوات على الأقل ياترى اهلها هيستنوني ولا هي ممكن تستحمل .. فكرت اني اسافر لاقيت ان حتى السفر محتاج اكتر من الشقة . بشتغل 16 ساعه في اليوم و مش قادر اعمل حاجه لنفسي يدوب بعيش و كمان اخويا متزوج و يعول م ش قادر حتى اساعده بوظيفه دخل اكاديميه خاصة و فضل يدرس 4 سنين و في الاخر طلعو نصابين و مخدش شهاده و كمان دخل الجيش على اساس انه كان هربان و سكتنا و لما اتجوز كان بيشتغل في شركه من الشركات الكبرى و فجأة بردو نصبو عليه و رفدوه على انو سرقهم و دفعونا 5000 جنيه غرامه عشان يسيبوه . و دلوقتي انا بشتغل و هو عاطل و مش لاقي يأكل بيتو و اسرته .. والدي 66 سنه بردو بيشتغل بعد ما كان في التربيه و التعليم و قبلها كان مدير شركة طيران كبري في السعوديه دلوقتي بيشتغل سائق في شركة سياحه عشان يساعد في البيت // انا مش عارف اعمل ايه مش عاوز اطلع في برنامج ولا اكون مشهور انا بس بطلب حل لمشاكلي هو ده صعب او مستحيل ؟؟ ليه ملقيش شغل لأخويا و اقدر اساعده / ليه ملقيش شقه ليا و اقدر استقر و اتجوز الأنسانه اللي اتمنتها / ليه مقدرش اريح والدي في كبر سنه و يفضل في البيت معزز مكرم / ساعدوووني انا بس محتاج مساعدتكم عشان الاقي حل ياترى هتقدرو ولا زي بلدنا بتقولوا كلام و بس .. تحياتي و احترامي لكم جميعا و اتمنى اني مكونش ازعجتكم